Chaqaloqning qayt qilishi

Chaqaloqlarning deyarli barchasida qayt qilish holati kuzatiladi. Odatda, bu holat o‘z-o‘zidan o‘tib ketadi va davolanish talab qilinmaydi. Ushbu eslatma qayt qilish qachon normal holat ekanligini va qachon shifokorga murojaat qilish kerakligini tushunishingizga yordam beradi.

Qayt qilish – bu vaqti-vaqti bilan ovqatning oshqozondan, unga olib boradigan naycha (qizilo‘ngach) orqali og‘izdan tashqariga chiqishidir. Bunday qayt qilish chaqaloqning yoshi kattalashgan sayin kamayib boradi.

Kichik yoshdagi bolalarning o‘ziga xos xususiyatlari tufayli

• Yangi tug‘ilgan chaqaloq deyarli doim yotadi
• Suyuq ovqat oshqozondan osonlikcha chiqib ketadi
• Kichkintoylarning qizilo‘ngachi qisqa bo‘ladi
• Go‘dak ko‘pincha ko‘p ovqat yeb qo‘yadi: u hali to‘yganini anglab yetmaydi.
• Bola ovqatlanish paytida havoni yutib yuborishi mumkin
• Ichakda to‘plangan gazlar oshqozonga bosim o‘tkazishi mumkin

Tashqi sabablar tufayli:

• ota-onaning xatolari: ko‘p ovqat berish yoki tartibsiz ovqatlantirish
• qattiq yo‘rgaklash
• ovqatlantirishdan so‘ng bolaning holatini keskin o‘zgartirish
• aralashma noto‘g‘ri tanlangan

Kasalliklar tufayli

• asab tizimi kasalliklari
• rivojlanishdagi nuqsonlar
• oziq-ovqat allergiyasi

✔ Chaqaloq ozgina – taxminan bir choy qoshiq miqdorida hazm bo‘lmagan yoki ivigan sut (aralashma)ni qayt qiladi.

✔ Ovqatlantirish paytida va qayt qilgandan so‘ng bezovta bo‘lmaydi.

✔ Vazni yaxshi oshib boradi.

Bunday holatlarda qayt qilishni davolash talab qilinmaydi.

🚩 Bola qayt qilish paytida qattiq yig‘laydi.

🚩 Bezovta bo‘lib ovqatlanadi va ovqatdan keyin darhol qayt qiladi.

🚩 Har bir ovqatlanishdan so‘ng fontan kabi ko‘p miqdorda qayt qiladi.

🚩 Qon yoki zardob aralash qayt qiladi. 

🚩Vazni ortmaydi yoki juda oz miqdorda ko‘payadi.

🚩 Bir yoshdan oshgan bolada qayt qilish holati davom etaveradi.
 

✔ Ovqatlantirgandan so‘ng bolani 10-15 daqiqa «ustun» holatida ushlab turing, shunda ichidagi havo chiqib ketadi.

✔ Kun davomida chaqaloqni «shoxdagi yo‘lbars» holatida (qorni bilan bilagingizda) ko‘tarib yuring. Bu ichak peristaltikasini rag‘batlantiradi va gazlarning chiqishiga yordam beradi.

✔ Chaqaloqning me’yoridan ortiq ovqatlanishiga yo‘l qo‘ymang.

✔ Emizish paytida bola havo yutmasligi uchun ko‘krakni to‘g‘ri tutishga e’tibor bering.

✔ Shisha va so‘rg‘ich bolaning yoshi va vazniga mos kelishini kuzatib boring.

✔ Kiyimning kengroqligi, chaqaloqning qornini siqmasligi va yo‘rgaklash qattiq bo‘lmasligi kerakligiga ishonch hosil qiling.

• Agar bola ko‘krak suti bilan oziqlanayotgan bo‘lsa, 2 hafta davomida o‘z ratsioningizda sut mahsulotlarini cheklashga harakat qiling. Qayt qilish kamaydimi? Unda sut va sutli mahsulotlarni iste’mol qilmaslikka harakat qiling. Agar yo‘q bo‘lsa, cheklovlar shart emas.
• Agar chaqaloq sun’iy ovqatlantirilayotgan bo‘lsa, pediatr bilan reflyuksga qarshi aralashmani qo‘llash yoki boshqa bolalar aralashmasiga o‘tish haqida maslahatlashing.

Qayt qilish bolaga qo‘shimcha ovqat berib boshlaganda – 4-6 oyligidan boshlab yoki chaqaloq tik turib va yura boshlaganda, ya’ni 9-12 oyligida to‘xtaydi.

Qayt qilish - vaqtinchalik hodisadir. Bolaning ahvoliga e’tiborli bo‘ling, “xavf belgilari”ni e’tibordan chetda qoldirmang va agar biror narsa sizni tashvishga solsa, pediatrga murojaat qiling. Kichkintoyingiz ulg‘ayib borishi bilan qayt qilish, shubhasiz, o‘z-o‘zidan to‘xtaydi!